Գեղանկարչություն

Գեղանկարչության բաժինը Փ. Թերլեմեզյանի անվան գեղարվեստի պետական քոլեջի հնագույն և հիմնական բաժիններից է, որտեղ ժամանակին դասավանդել են մեծ վարպետներ Սեդրակ Առաքելյանը, Վրթանես Ախիկյանը, Գաբրիել Գյուրջյանը, Ստեփան Աղաջանյանը և այլոք: Տարիներ շարունակ այստեղ դասավանդվում են ակադեմիական գեղանկարչության, գծանկարչության և կոմպոզիցիայի սկզբունքներն ու խնդիրները, ինչպես նաև կիրառվում են մեր երախտավոր նկարիչ-դասախոսների կողմից մշակված և հաստատված ուսումնական ծրագրերը: Այդ ծրագրերում` հիմնական մասնագիտական առարկաների, անատոմիայի և տեխնոլոգիայի դասաժամերին զուգահեռ, հատուկ տեղ է հատկացվում ամառային /պլեներային/ աշխատանքներին, որոնք, որպես ավանդույթ, ցուցադրվում են տարեվերջյան հաշվետու ցուցահանդեսներին: